Nagaland-ah PM Modi lim an hal

Nagaland khawchhak lam district paruka 'Public emergency' puang mektu, Eastern Nagaland People’s Organisation (ENPO) chuan state hran ngiata bandh an huaihawt chu an la chhunzawm zel. Nilaini khan an thil phut a hlawhtlin mai loh avanga lungawi lo pawl hrang hrang chuan sorkar laipui hotute lim an hal.

Eastern Naga Students Federation (ENSF) leh Chang Wedoshi Setshang (CWS) pawl kaihhruaina hnuaiah March 13, Nilaini khan zirlai ṭhahnem tak chuan kawng an zawh a, he hunah hian prime minister Narendra Modi, union home minister Amit Shah leh BJP national president JP Nadda lim an hal. Mipui lungawi lo pung khawmte hian sorkar laipuiin 'Frontier Nagaland' an ngiatna a ngaithlak duh loh avangin sorkar demna thu hrang hrang an tarlang a ni.

ENPO hian kum 2010 aṭang khan Nagaland khaw chhak lama district parukte chu state hrana siam an lo ngiat tawh a, heng district parukte hi- Mon, Tuensang, Longleng, Kiphire, Noklak leh Shamator- te an ni. Heng district-ah hian Naga hnam Chang, Khiamniungan, Konyak, Phom, Sangtam, Tikhir leh Yimkhiung chu a cheng tam zawk an ni. Rorelna hran an ngiatna chhan hi khawchhak lam bialte hian ngaihsakna ṭha an dawn loh avanga hmasawnnain a kal kan ṭhin ni vang niin an sawi.