Kuki Inpi-in Meitei Resurgence Forum puhna an chhang let

Meitei Resurgence Forum (MReF)-in nikuma Manipur-a chi leh chi inkara buaina chhuah chhana a puhna chu Kuki Inpi Manipur chuan na taka chhang letin, an puhna hi thu belhchiandawl lo a nih thu an sawi.

MReF hian Kuki Inpi chu thu dik tawk lo theh darhah puhin buaina hi a chhuah phah ta niin an puh.

Thuchhuah an siamah, Kuki Inpi chuan May 3, 2023-a buaina chhuah chhan chu Kuki-Zo hnam nuai bo an nih theih nana Meitei sorkarin tenawm taka hma a lak vang a nih zawk thu an sawi. Kuki-Zo hnam tiduhdah a, an tawrhna thlentir turin Meitei kalfawr pawl; Arambai Tenggol leh Meeitei Leepun chuan hma an lak bawk thu an tarlang.

Kuki Inpi thuchhuah chuan Meitei kalfawr pawlte'n Kuki-Zo hnam lakah May 3 aṭangin hleihlenna an lantir ṭan tih an sawi a, buaina chhuah chhan ber chu Meitei kalfawr pawlin Kangvai-a Pastor Sehkhohao Kipgen an thah vang leh, Meitei-hoin Kangvai leh Imphal-a Kuki in leh lo an hal vang a nih zawk thu an sawi. Hemi hnu hian Meitei pawl hrang hrang leh anmahni thlawptu sorkar sipaite chu Kuki hnam chungah nunrawng takin an che zui a, an chunga thil thleng chu India ram chanchina mipuite tawrhna rapthlak ber pakhat tia hriatreng a ni tawh dawn niin an sawi.