Assam : AASU-in CAA dodalna lantir zel dan tur an puang

Citizenship Amend­ment Act, 2019 hman ṭan a nih tawh dawn avanga Assam- a dodalna lantirtu zinga langsar ber, All Assam Students' Union (AASU) chuan hma an lak zel dan tur an puang. Assam-a zirlai pawl lian ber hian sorkar laipuiin CAA inkaihhruaina dan zam hman ṭan a nih dawn thu an sawi hnu aṭangin lungawi lohna hi an lantir tawh a ni.

AASU hian nimin, March 14 aṭang khan an dodalna an thar thawh leh a, nimin khan Assam huam chhunga hmun hrang hrangah flag dum zarin CAA an duh lohna an lantir leh. Vawiin aṭangin Assam district-a khawpui zawng zawngah mipuite chu pung khawmin an lungawi lohna lantir turin an hriattir a, tin, vawiin aṭangin 'Satyagraha' nei ṭan turin ASSU hian thu a chhuah bawk.

Zirlai pawl hian an hmalaknain awmzia a nei lo a nih chuan CAA an dodalna chungchanga hmalak zel dan ngaihtuah turin March 18 hian meeting an nei dawn tih an tarlang. Hetah hian AASU bakah Coordination Committee of Tribal Organisations of Assam (CCTOA) leh tribal pawl 30 aiawhte nen an inhmu khawm dawn a, an kal zel dan tur an sawiho dawn a ni.