Meghalaya BJP-in an state puma CAA hman a nih loh nan hma an la

Meghalaya BJP chuan an state-a sixth schedule huam chhunga awm loah pawh CAA hman a nih lohna turin sorkar laipuiah ngenna an thlen.

Sorkar laipuiin hman ṭan tura a tih, CAA hi Meghalaya-a sixth schedule hnuaia awm, hmun tam zawkah chuan hman a ni ve dawn lo. Hetih lai hian sixth schedule-in a huam loh hmunte a awm avangin heng hmunah erawh chuan hman a ngai dawn a ni.

Cabinet minister leh BJP hotu, AL Hek chuan mipuite tana a ṭhat dawn zawk avangin Meghalaya state pumah CAA dan hman loh chu ṭha a tih thu a sawi. CAA hman a nih loh chuan Lok Sabha inthlanpui lo awm turah pawh an state chhungah BJP dinhmun a ṭhat phah dawn a ni, a ti.

BJP MLA Sanbor Shullai chuan CAA chungchanga thu dik tawk lo theh darh lo turin party dangte chu a chah a, prime minister Narendra Modi chuan tribal ram china CAA hmang lo tura thutlukna a siam avangin a fak bawk. Shullai hian CAA vanga khua leh tui nihna nei thei tur zinga Kristian sakhaw vuantute telh an ni chu lawmawm a tih thu a sawi bawk.