Manipur : UNLF-P helpawl man vangin nawrh huaihawt

United National Liberation Front - Pambei (UNLF-P) mi leh sa pathum man an nih avanga lungawi lohna lantir nan Manipur-a tlawmngai pawl 12 inzawm khawm chuan darkar 48 awh tur nawrh an huaihawt. Nawrh hi Ningani zanlai aṭanga ṭan niin, zanin zanlai thleng a awh dawn a ni.

UNLF-P mi leh sate hi National Investigation Agency (NIA) chuan Nilaini khan an man a, Meitei helpawl an nih avangin Imphal phairuamah dodalna lantirtu leh mipui lungawi lo an ṭhahnem hle.

Federation of Civil Society Organisations (FCSO) president Th Manihar chuan thuthar theh darhtute a kawmnaah nawrh an huaihawt chhan chu hun tiam an pek chhunga mi mante sorkarin a chhuah loh vang niin a sawi. NIA-in an mi mante hi Ningani tlai dar 1 hmaa chhuah turin sorkar chu ngen mah se, awmzia a awm loh avangin nawrh hi an huaihawt ta a ni. Manihar chuan man tawkte chhuah an nih loh chuan Lok Sabha inthlan boycott thlenga hmalak an tum thu a sawi bawk.

Tlawmngai pawl 12-te hian UNLF-P leh sorkar laipuiin inremna zawnga inbiakna an kalpui mek laia an hruaitu pawimawh man a ni chu an hrethiam lo hle tih an sawi. Manipur FCSO chuan helpawl mi leh sa man chu inkahhai thuthlung ziah nen a inkalh tih sawiin remna zawnga inbiakna neih mekah pawh nghawng a neih a hlauhawm thu an sawi. FCSO aiawhte chu sorkar laipui hotute dawr turin nimin khan Delhi lamah an zin thla a, hemi chungchang hi thuneitute an sawipui dawn a ni.

Manipur chief minister N Biren Singh chuan UNLF-P hruaitu pathumin man an tawh chungchangah state sorkar chu râwn an nih loh thu leh, Manipur sorkar chuan man an nih tur thu engmah an dawng lo niin a sawi. Biren Singh chuan sorkar laipui hotute hnenah NIA-in an mante chu chhuah leh vat turin ngenna a thlen tawh tih a sawi a, hemi bakah hian hma lam hunah midang man tur an awm leh a nih pawhin state sorkar chu hrilh hre turin a ngen nghal bawk.

United National Liberation Front - Pambei (UNLF-P) hi Manipur-a helpawl upa ber zinga mi niin nikum November khan sorkar laipui nen inkahhai thuthlung an ziak a, tunah hian remna tluantling a awm theih nan inbiakna an nei mek. NIA hian Nilaini khan UNLF-P mi leh sa pathum an man a, heng zingah hian an hruaitu pawimawh tak Army Chief Thokchom Thoiba leh Chief Intelligence in-charge Laimayum Ingba-te an tel a ni.