Meghalaya : Harijan Colony-a bomb puak HNLC-in an tih a nih thu an sawi

Meghalaya khawpui, Shillong-a Punjabi lane-a kar liam ta Inrinnia bomb puak chu Hynniewtrep National Liberation Council (HNLC) chuan an tih a nih thu an sawi. Punjabi lane-a bomb puak avang hian mi pakhatin hliam a tuar a, thi erawh an awm lo.

HNLC hi Meghalaya chhunga helpawl pakhat niin, Khasi-Jaintia hnam aiawh niin an inchhal a, Meghalaya chu pawn lam mi laka humhim chu an thil tum ber niin an sawi.

Helpawl hian Punjabi lane-a khawsate chu hmun danga sawn an ngiat a, mahse, sorkar chuan an ngenna a ngaih pawimawh loh avangin tharum hmanga an chet mai a ngai ta niin general secretary Saikupar Nongtraw chuan a sawi. Nongtraw chuan sorkarin an hnam himna a ngai pawimawh lo a nih chuan buaina nasa zawk a chhuak ang tiin Meghalaya sorkar chu a vaukhan bawk. Sorkar chu Punjabi lane a awmte sawn turin thla khat hun pek an nih thu sawiin, Hynniewtrep tana hnawksak zawnga chet la an awm a nih chuan an chhang let zel dawn a ni, a ti.

Punjabi lane-a bomb puah hnu hian Harijan Panchayat Committee chuan union home minister hnenah an buainaa inrawlh tur leh hma la turin ngenna an thlen a ni. Punjabi lane-a awmte chuan Shillong-ah hian British hunlai aṭanga cheng tawh ni mah se, ram leilung fate chuan Punjabi hnam awm chu ngaithei loin tun thlengin tihduhdah an tuar niin an sawi.