Modi leh Amit Shah lim halin rah ṭha a chhuah phah lo : Nagaland BJP

Nagaland aṭanga Frontier Nagaland Territory ngiata nawrh huaihawtnaah prime minister, home minister leh BJP national president lim chu zirlai pawlte'n an hal a, hetianga chetna hi Nagaland BJP chuan ṭul an tih loh bakah rah ṭha engmah a chhuah lo niin an sawi.

Nagaland BJP president Benjamin Yepthomi chuan Eastern Nagaland People's Organisation (ENPO) kaihhruaia nawrh huaihawt mekte chuan an thil phut chungchang zawk chu ngaihtuah vat a ngai zawk niin a sawi.

Benjamin chuan ENPO-in Nagaland khaw chhak lam tana rorelna hran an ngiat chhan chu sorkar laipuiin a hrethiam hle niin a sawi a, mahse, nawrh huaihawttute chu mumal taka inbiakna kalpui zawk tura a duh thu a sawi. Hemi bakah hian sorkar laipuiin Nagaland khaw chhak lama chengte thil ngiat uluk taka zir chianga, hmalakna a neih mek laia hotute lim hal a ni chu thil ṭul lo tak a nih thu a sawi bawk. Nagaland BJP President hian Modi kaihhruai sorkar hnuaiah Eastern Nagaland tana hmasawnna hnathawh hrang hrangte tarlangin, PM-DevINE hnuaiah Rs. vbc. 180 dah.hran a nih thu sawiin, BJP-in Nagaland khawchhak lam hmasawnna a ngaih pawimawhzia a sawi lang.