NSCN-IM hotuin Ram danga Naga peace talk neih a rawt

National Socialist Council of Nagaland (Isak-Muivah) general secretary Thuingaleng Muivah chuan kumin February thlaa prime minister Narendra Modi hnena lehkha a thawnah, Naga peace talk neihah inbiakna chu India ni lo, ram dangah neih a rawt. 

NSCN-IM chuan remna leh muanna zawnga inbiakna neih chu PM level-a a bul aṭanga ṭan thar a, ram pawn lama inbiakna neih an duh thu an sawi a ni. 

Muivah hian Thawhṭanni khan PM hnena a lekha thawn, phek riata chhah hi media ho hnenah a puangzar a, an rawtna thlen hi Prime Minister office aṭanga chhanna an la hmu lo tih a sawi bawk. 

Muivah hi NSCN-IM inrel­bawlnaah hian Ato Kilonser a ni a, hei hi Prime Minister tihna a ni. Hei vang hian Naga buaina chinfelna turin ram pawn lamah PM level inbiakna neih hi a rawt a ni. Tun hma lamin Naga peace talk hi ram pawnah neih a lo ni tawh ṭhin a; Paris, Zurich, Geneva, Vienna, Milan, Hague, New York, Bangkok, Kuala Lumpur leh Osaka-ahte inbiakna an lo nei tawh a ni. 

Sorkar laipui nena inbiakna neih mekah Naga flag leh consti­tution chungchang tih loh, thil dangah chuan inremna an siam thei tawh niin Muivah chuan a sawi bawk. PM hnena lehkha a thawnah hian Muivah chuan, "Kum 22 liamtaah khan India ram pawnah thu delhkilh engmah awm loin PM level inbiakna hi neih ṭan a ni tawh. Sorkar laipui sawmna angin India ramah kan lut a, mahse kum 20 chuang a inbiakna kalpui a nih hnuah pawh Ministry of Home Affairs leh a agency dangte chet dan ngeiawm tak awm ṭhin hi mak kan ti hle a ni," a ti. Sorkar laipuiin NSCN-IM member-te firfiaka puang a, a agency-te kaltlanga a man ṭhin chuan a ṭhawngin mak a tih hle tih a sawi bawk. 

Inremna kawng zawnnaa sorkar laipuiin palai atana a ruat, Nagaland governor ni lai RN Ravi hmalak dan chu sawiselin, boruak ṭha a awm theihna tura Naga mite inpumkhat tir aiin Naga society-ah inhalna a thlen zawk a ni, a ti. 

Kumin January thlaa inbiakna nei ṭuma NSCN-IM rawtna thlente 'atthlak leh ṭha lo' tia a sawi chu Naga talk team zahlohna lian taka a ngaih thu a sawi. Sorkar laipui palai chet dan hi an pawm thei lo tih a sawi a ni.