Manipur-a intihbuainaah police 10-in hliam tuar

Manipur-a National Sports University permanent campus tur ram pek chungchanga mipui lungawi lo leh police-te innawr buainaah police 10 in hliam an tuar. Hliam tuar zingah hian Imphal West additional superintendent of police leh commando unit-a deputy superintendent te an tel. 

National Sports University permanent campus hi Imphal West district leh Kangpokpi district inrina hmunah siam a ni. Thawhṭanni khan NSU campus siam lai en tur hian Imphal West district thuneitute leh security force-te an kal a ni. Mahse a hmun an thlen hian Kongkokpi district lam mite lo awmin, campus siamna tur hmun eng emaw zat chu an district huam chhung ami ni a sawiin Kangpokpi district thuneitu, village leader leh civil society organisation hrang hrang aiawhte awm laia siam an phut. 

Mipui pungkhawmte hian security force-te hi lo dangin an innawr zui a, lung leh sairawkherh nen an lo tawng a, police lam hian hnawh darh nan tear gas an phuh bakah mock bomb pawh an hmang tel bawk. 

Innawr buainaah hian mipui lam aṭang pawhin hliam tuar an awm nia sawi a ni a, mahse a zat chiah erawh hriat chian a la ni lo.