Manipur-a Naga chengte'n Assam Rifles lakah lungawi lohna lantir

Assam Rifles sipaite'n Manipur-a Makuai (Atengba) khuaa hmeichhe pung khawm hnawh darh nan silai an hmeh puah avangin, Manipur chhunga Naga chengte chuan Assam Rifle hmalakna an boycott tur thu an puang. Lungawi lohna lantirtute hi Tamenglong leh Noney district-a Naga chengte an ni a, heng district pahnih hi Manipur hmarthlang lama awm niin Nagaland leh Assam state nen an inri a ni.

Rongmei Naga Council Manipur (RNCM) chuan Assam Rifles chet dan an duh lohna lantir nan hian kar liam ta Zirtawpni khan Tamenglong district-ah darkar ruk bandh an lo huaihawt tawh a ni. Hemi hnu hian Naga hnam hrang hrang Zeme, Liangmai, Rongmei leh Inpui Naga-te chenna hmunah Assam Rifle hmalakna reng reng chu thlawp lo turin thu an titlu bawk. RNMC hian 6 Assam Rifles mi leh sate'n silai hmanga hmeichhe pung khawm an hnawhdarh avang hian mipui thlabarin an siam thu sawiin, remna leh muanna an neih chu a tiderthawng bawk niin an sawi.

Chingkao khuaa AR sipai lut tur chu Naga hmeichhiate hian an lo dang a ni. He khuaah hian village volunteer chuan ralthuam hman dan zirna an neih ṭhin avangin sipai lut tur hi an dang nia sawi a ni. Hetih lai hian RNMC chuan sipai lam chet dan hi an dem thung a, mipui rorelna ramah chuan sipaite pawhin mipuite duhdan chu a zahsak tur a ni, an ti.