Assam waterway project atan Rs. vbc. 645 ruahman

Union Minister of Ports, Shipping & Waterways, Sarbananda Sonowal chuan Sagarmala programme hnuaia lui lam inkalpawhna ṭha zawk siamna turin Assam tan vaibelchhe 645 an pawmpui tih a sawi. Heng sum hi Brahmaputra (National Waterway-2) chei hnum nan hman a ni ang.

Sum ruahman hi project hrang hrang 10-ah hman a ni dawn a, chung sum hmanga hnathawhte chuan lui lama inkalpawhna ṭha a siam mai bakah sum leh pai dinhmun chawikangtu a nih ngei an beisei a ni. Hemi bakah hian lui mawina hmanga khualzin hip bakah mipui veivah nan awlsamna a siam ngei an beisei.

Sagarmala programme hi Ministry of Ports, Shipping & Waterways hnuaia hmalakna a ni. He programme hnuaia hnathawhte hian sorkar laipui hnen aṭangin 100% funding hmuin lui lama sumdawnna hmunhma tihchangtlun chu a tum ber pakhat a ni.