2027 ral hmain Tripura-ah Malaria um bo tum a ni : Health department

Malaria umbo kawnga hmalakna kal zelah kar liam ta Ningani aṭanga Inrinni thleng khan Tripura-ah seminar buaisaih a ni. Tripura Health department chuan National Centre for Vector Borne Disease leh National Health Mission nena ṭangkawpin kum 2027 ral hmain an state chu Malaria awm lohna hmuna siam an tum.

Ministry of Health and Family Welfare, joint secretary, Rajiv Manjhi chuan an state chhunga hriselna kaihhnawiha thawktute chu zirtirna an neih thu tarlangin malaria umbo a nih theih nan ṭanrual a ngaih thu a sawi. ASHA worker-te chu damlo awmna in chhung tlawh a, an chinchang hre turin an hrilh hre tawh tih a sawi bawk.

Rajiv Manjhi chuan an state chhunga thingtlang khaw kilkhawr tak takah malaria chu a hluar thu sawiin, chung hmuna inenkawlna ṭha chhawpchhuah chu a harsat thu a sawi. Malaria dona kawng khat atan heng hmunah hian thosi hloa chiah thosilen nuai 9 chuang chu sem chhuah a ni dawn a, hemi bakah hian kum tina lo neihna hmun sawn ṭhinte chu malaria laka him lo an nih avangin mumal taka endik an ni ṭhin dawn bawk a ni.