Meghalaya : IFSA-in CCF thih dan CBI chhuitir turin ngen

Meghalaya Chief Conservator of Forests (CCF), N Luikham thihna chhui chiang turin Central Bureau of Investigation (CBI) an duh thu Indian Forest Service Association (IFSA) chuan Meghalaya chief secretary hnenah ziakin an thlen.

N Luikham hi Indian Forest Service (IFoS) niin 2003 batch a ni a, a boral lai hian Meghalaya CCF hna hi a chelh mek a ni. A hnathawh kawnga hmingṭha leh fak hlawh tak Luikham hi Nilaini liam ta khan a chenna inah thia hmuh a ni. A thih chhan hi mahni intihlum tia ziah luh ni mah se, IFSA chuan CBI chhui chiantir an phut thung.

IFSA hian Luikham chu mipat-hmeichhiat kawnga inpuh hmingchhiatna avangin rilru lamah harsatna a nei niin an sawi. Hetia puh hmingchhetute hi leilung hausakna laichhuak ṭhin ṭhenkhatin an thlawp tih sawiin Luikham thiam lohna erawh hmuhchhuah a ni lo a ni, an ti. Hetianga thil a thlen avang hian IFSA chuan ṭan lam nei lo tura ngaih CBI ngeiin chhui chiang se an duh thu chief secretary hnenah hian an thlen a ni. IFSA chuan ramngaw humhalh kawnga Luikham hmalakna chu fakin a thihna chu ramngaw leh nungcha humhalh kawnga hnungtawlhna a nih thu an sawi.