Arunachal leh Sikkim-te April-19 ah inthlang dawn

Election Commission of India (ECI) chuan Sikkim leh Arunachal Pradesh assembly inthlan hun tur atan April 19 a ruat.

Sikkim, Arunachal Pradesh, Odisha leh Andhra Pradesh-te chu Lok Sabha inthlan ruala state assembly inthlang ve tur an ni. Sikkim leh Arunachal Pradesh assembly inthlana vote tla chhiar hun atan June 4 ruahman a ni. Inthlan chuh tumte'n March 27 thleng nomination an file thei ang a, March 30 thleng inhnuhdawhna hun siamsak an ni bawk.

Sikkim Krantikari Morcha (SKM) hi tuna Sikkim-a rorel lai an ni a, anni hian chief minister ni mek Prem Singh Tamang kaihhruaina hnuaiah inthlan hi an hmachhawn leh dawn a ni. SKM hian inthlan hnuhnung ber khan Pawan Kumar Chamling kaihhruai Sikkim Democratic Front (SDF) an paihthla a ni. Kum 2019-a inthlanah khan member 32 awmna state assembly-ah hian SKM chuan seat 17 lain, seat 15 chu SDF hian an la thung. Tun ṭum inthlan lo awm turah pawh hian heng party pahnihte hi inbei leh ber tura ngaih an ni. Rorel lai SKM hi BJP kaihhruai NDA-a tel mek an ni.

BJP chuan Arunachal Pradesh-a inthlan hnuhnung ber, kum 2019 khan a vawi khatna atan sorkarna an siam a, assembly seat 60 awmnaah seat 41 lai an la a ni. Tunhnai lawk khan National People’s Party (NPP) MLA pahnih leh Congress MLA pathumin BJP an zawm thar avangin inthlan lo awm turah pawh hian an dinhmun a ṭha thawkhat hle a, sorkarna an siam leh ngei pawh an inbeisei.