Manipur : Pathianniah buaina hrang hrang a chhuak

Manipur-a Imphal East district leh Kangpokpi district inrinaa balu laih chhuahna hmunah Pathianni tlai khan inkahna a thleng a, helai hmuna awm motor pathum chu hal an ni bawk. Motor pathum halte hi - excavator, dipper leh Gypsy-te an ni a, Kaihao leh Laikhoi khuaah balu lak hna thawk tura dah an ni.

Police-te chuan ralthuam kengte'n balu laih chhuahnaa thawkte chu Pathianni tlai dar 3:30 khan an kap ṭan a, silai an hmeh puah bakah bomb pawh an hmang tel niin an sawi. Hemi hnu hian Manipur-a hnam pahnih buaina nei meka an village volunteer-te chuan inkahna an nei zui a, darkar thum chuang an inkap nia hriat a ni.

Buaina chhuah hnu hian balu laih chhuahna hmuna thawktute chu an tlanchhia nia hriat a ni, mahse, driver pahnih erawh an chin hriat a ni hrih lo. Buaina chhuahna hmun hi police-te chuan a rang thei ang berin an pan nghal a, police thlen hnu hian inkahna pawhin ziaawm lam a pan ve nghal a ni. Police lam hian chin hriat loha awm driver pahnih chu zawn mek an nih thu an sawi.

Helai hmunah hian inkahna hi a chhuah ṭum hnihna a ni a, February 6 khan hetiang ang inkahna hi a lo chhuak tawh bawk a ni. Manipur chhung hmun dangah Pathianni vek khan inkahna a thleng bawk. Police-te chuan Bishnupur district-a Thamnapokpi-ah inkahna hi a thleng nia sawiin, thi leh hliam erawh a awm lo.

Indigenous Tribal Leaders’ Forum (ITLF) pisa, Churachandpur-a mi chu Pathianni zan vek khan tu tih hriat loh misualin an suasam. ITLF pisaa lehkha pawimawh, computer leh bungraw tam tak an tichhia. Pawikhawihtu hi tute nge an nih hriat a ni rih lo a, chhui chian mek an ni.