Tripura : Smuggler leh BSF inbeihnaah mi pakhatin nunna chan

Bangladesh aṭanga rawn lut, smuggler ni ngeia rinte leh Border Security Force (BSF) te chu Pathianni zan khan an inkap a, smuggler pakhatin nunna chânin, a dang pakhat chuan hliam a tuar a, BSF pakhatin hliam a tuar ve bawk.

BSF hian thil tawlhruk tum ni ngeia hriatte chu Magroli, Unakoti district-ah hmuin hnawhkir an tum a, heng mite hi India lam aṭanga kal mi 15-20 vel leh Bangladesh lam aṭanga lo chho mi 30 bawr vel an ni. BSF hian hnawh darh tum mah se, smuggler lam hian lung hmangin BSF lam hi an bei hmasa a, hemi hnu hian BSF hian an kap ta a ni.

Inthlana duty turin BSF company panga tirh chhuah an ni a, hei vang hian ramriah duty an indaih lo deuh a, smuggler-ho hian hriain remchangah hman an tum niin an sawi.

Railway Protection Force (RPF), Government Railway Police (GRP) leh BSF thawkho chuan Pathianni vek khan Rohingya raltlan pathum hnen aṭangin 'brown sugar' Rs. vbc. 1 hu an mansak. BSF hian an thu dawn bawhzuiin, Agartala aṭanga rel hmanga chhuk, Rohingya mi pathumte hi Kumarghat railway station, Unakoti district-ah an lo man a ni. BSF leh RPF chuan joint operation dangah 'brown sugar' cheng nuai 14 man hu chu Kumarghat railway station aṭang bawkin an man, an thil man hi sahbawn bawma dah niin, a neitu hriat a nih loh thu an tarlang.