Assam : Muslim sakhaw vuantute misual anga chantirin sawisel a hlawh

Assam-a Bodoland University chuan hnam ziarang pho chhuaka lantirna hun an neihah, Muslim sakhaw vuantute chu misual anga an chantir avangin Muslim zirlai pawlte an lungawi lo hle.

Hnam ziarang pho chhuahna hun hi Bodoland University hnuaia Department of History buatsaih niin theme atan 'Bodo Legendary Heroes' tih chu hman a ni. He hunah hian Muslim sakhaw inthuamna inbelte chu thil an tihsual avanga man tawk anga lantir an ni. Police lema changte chuan Muslim lem changte chu an kut hnungkhirhsakin an vaw zui bawk.

Muslim Student Union of Assam (MSUA) central president, Jalal Uddin chuan zirna in sangte'n Muslim misual lema an chantir hi hriatthiam harsa an tih thu a sawi. Bodoland University chu hetiang an tih avang hian a dem tak zet tih sawiin, ni hnih chhung insawi fiahna hun pek a, hemi hun chhunga an insawi fiah loh chuan university lakah hian FIR an theh luh tur thu a sawi.

AMSU West Kokrajhar District Committee chuan Bodoland University ang zirna in pawimawhin hnam ziarang an pho chhuahnaah a ṭha lai zawk lantir tur an nih laia hetianga Muslim sakhaw vuantute tihhmingchhiatna hawi zawnga thil an lantir hi an enliam mai mai dawn lo tih an sawi ve bawk. AMSU bakah hian zirlai pawl dang North East Minority Students Union (NEMU), Krishak Shramiak Unnayan Sangram Samiti (KSUSS), Muslim Jatiya Parishad (MJP) leh Burman Mandai Students Union (BMSU)-te pawhin university-a thil thleng chu an dem takzet tih an sawi ve bawk.