Manipur buaina a reh theih nan UN a inrawlh a ngai : COCOMI

Coordination Committee on Manipur Integrity (COCOMI) thupuangtu, Khuraijam Athouba chuan thla riat chhung buainain a chenchilh, Manipur-a buaina a reh theih nan United Nations (UN) chu inrawlh tura a duh thu a sawi.

Athouba hian 55th UN Human Rights Council session,Geneva-a neih mekah thu sawiin UN chu inrawlh turin a duh thu a sawi a, Manipur chu nunphung pangngaia a awm leh theih nan leh, remna leh muanna tluantling a awm theih nan UN chu hma la turin a ngen a ni.

COCOMI thupuangtu chuan an state chu ram dang mi, ruihhlo tawlh ru ṭhin avangin, a chhunga chengte'n an tuar niin a sawi. Hemi bakah hian sorkar laipui chu hmarchhak state-a mimal zalenna inrahbehsakna thleng chungchangah thu kimchang puang chhuak turin a ngen bawk.

Athouba chuan an state-in buaina hrang hrang a neihte chu ram dang hriat turin a sawi lang a, dan loa lut an awm bakah sorkar phal loh poopy chinna hmun tam tak a awm niin a sawi.

AR-in Tengnoupal district-ah ralthuam an man

Assam Rifles-te chuan Tengnoupal district-ah ralthuam hmang tura inzirtirna hmun ni ngeia an hriat chu an luhchhuah a, indo nunchan zir nana ralthuam an hmante chu an mansak. Pengpalep, Tengnoupal district-ah village volunteer-te'n camp an siam thu an dawn chu bawhzuiin Assam Rifles hian hma an la a ni.

AR-te'n camp an thlen hian mihring tu mah hmuh an nei lo a, an kal bo hman nia rin a ni. Mahse ralthuam thuhruk engemaw zat an man thung a, heng zingah hian silai leh a mu bakah grenade launchers leh IED te an tel. Ralthuam man hi police station hnai berah hlan chhawn an ni.