CAA dan hnuaia khua leh tui nihna dil mi nuai 3-5 vel an awm rinawm : Assam CM

Assam chief minister Himanta Biswa Sarma chuan an state chhungah Citizenship Amendment Act (CAA) dan hnuaia India khua leh tui nihna diltu mi nuai thum aṭanga nuai nga vel an awm a rin thu a sawi. Heng zinga a tam ber chu National Register of Citizens (NRC) siam thara tel ve lo an nih a rinawm thu a sawi bawk.

CM Sarma hian NRC siam thara tel ve lo zingah Muslim nuai sarih leh Hindu-Bengali nuai nga an awm thu a sawi. Hindu-Bengali NRC list-a an tel loh chhan sawi fiah zuiin, Assam an rawn luh hnuah a tam zawk chu refugee camp-ahte hun an hmang a, NRC list-a tel tura lehkha pawimawh an theh luh chu NRC state coordinator hlui, Prateek Hajela chuan a lo hnawlsak a ni, a ti.

Sarma hian Muslim leh Hindu-Bengali bakah Assam leilung fate ngei pawh mi nuai hnih zet NRC list-ah chuan an lang lo niin a sawi a, chung zinga a langsar deuhte chu Das, Gurkha leh Koch-Rajbongshi hnamte an ni. Chief Minister hian NRC a tel lo, Hindu-Bengali-te chuan India khua leh tui nihna chu an dil vek a rin thu sawiin, a bak CAA dan hnuaia dil ve thei lote chuan India danpui hnuaia inziak hmangin khua leh tui nihna chu an dil thei reng tih a sawi bawk.