Drugs hmanga insumdawn tawnna tihchhiat vek kan tum : Nagaland DGP

Nagaland Director General of Police, Rupin Sharma chuan Police complex-a thuthar theh darhtute a kawmnaah Nagaland chhunga ruihhlo do beihpui an thlak chu a hlawhtling thawkhat hle tih a sawi.

Nagaland Police-te chuan ruihhlo leh a kawltu an man zat puangzarin, thla thum liam ta (1 Dec, 2023 - 10 Mar, 2024) chhung khan mi 122 an man thu an tarlang. Hemi hun chhung vek hian Narcotic Drugs and Psychotropic Substances Act, 1985 hnuaiah thubuai 48 an ziak lut bawk. Prevention of Illicit Traffic in Narcotic Drugs and Psychotropic Substances Act 1988 (PITNDPS) Act, 1988 hmangin rinhlelh mi 12 chu an hreng mek tih an tarlang tel bawk a ni.

DGP Sharma chuan tam tham loa khawlaia ruihhlo zuar ṭhin chauh man chu an tum a nih loh thu sawiin, ruihhlo hmanga hlawm lian tak taka sumdawng leh an zawmpuite chhui chhuah chu an tum tih a sawi. "Drugs hmanga insumdawn tawnna hi tihchhiat vek kan tum a ni" a ti.

Nagaland DGP hian China aṭanga kal, Netherland leh Manipur kaltlanga Nagaland a lut ṭhin drugs network pakhat chu an chhui chhuah thu a tarlang. Khawvel ram hrang hranga ruihhlo tawlh ru ṭhinte hian cryptocurrencies chu an hmang ṭangkai niin a sawi bawk. Nagaland Police hian mipuite hnenah MADEIN App kaltlangin emaw police station hnai berah emaw ruihhlo hmanga sumdawng an hriat chu hrilh hre zel turin an ngen.