Meghalaya-ah ILP hman duhna a lian sawt hle

Meghalaya mipuiteah an state chhunga Inner Line Permit (ILP) hman ve duhna a lian leh tawh hle. Hei hi Citizenship Amendment Act (CAA) dan hman ṭan a nih tur thu puan a nih vang pakhat a ni.

Meghalaya hi sixth schedule hnuaiah an state chhung hmun tam zawk a awm avangin CAA hi state huam chhung hmun tam zawkah hman a ni ve dawn lo a, mahse, an state ṭhenawm hmun hrang hrangah hman a ni dawn thung. Heng state, a bikin Assam aṭanga CAA hmanga India khua leh tui nihna neite hian, Meghalaya chu ILP ngai loa luh theih a nih avangin an state chu khua leh tui nihna nei tharte hian inbenbel nan an hmang ang tih Meghalaya leilung fate chuan an hlauthawng ṭan der tawh.

Hynniewtrep Youth Council (HYC) president, Roy Kupar Synrem chuan CAA chu an state chhung hmun tam zawkah hman ni dawn lo mah se, sixth schedule huam chhung ni lo tam tak an state-ah a awm thu sawiin, an state khawpui Shillong ngei pawh sixth schedule-in a huam tel loh thu a sawi. Hetiang a nih avang hian India rama rawn pem tharte hian CAA dan chu remchangah hmangin Meghalaya chhungah hnam dang tam tak an rawn luh a hlauhawm a ni, a ti.

Synrem chuan Meghalaya -a pem luh tum dan nan an state-ah ILP hman leh CAA chu an state puma hman ve loh a ngai niin a sawi. Hei hi Meghalaya-a pawl hrang hrang duh dan a ni bawk a, Jaintia National Council (JNC) leh Confederation of Ri Bhoi People (CORP) chuan an state chhunga ILP hman a nih ve theih nan chief minister Conrad Sangma hnenah petition an theh lut bawk.

ILP hman a nih theih nana hmalakna hi Meghalaya tan thil thar a ni lo a, kum 2019 khan an state legislative assembly chuan ILP hman an duhna resolution chu a lo pawm tawh a, he resolution hian union home ministry pawmpuina a nghak mek a ni. Meghalaya CM Conrad Sangma pawhin vawi tam tak prime minister Modi hnenah Meghalaya ram leilung fate him zawk nan an state chhunga ILP hman a ngaih thu a sawipui tawh a ni. Tun hnaiah hian CAA dan hman a nih dawn avangin Meghalaya mipuiteah ram dang mi lo lut an tam hlauhna a lian hle a, hei vang hian ILP hman ve duhna pawh hi state mipuiteah a lian thar hle a ni.

ILP hi India ram state paliah hman mek a ni a, heng state-ah hian ram leilung fa ni lo, pawn lam mi, state chhunga lut turte chuan ILP an neih a ngai a ni. ILP hi Arunachal Pradesh, Nagaland, Manipur leh Mizoram-ahte hman mek niin, union territory zingah Lakshadweep-ah hman a ni bawk.