Nagaland : ENPO-in inthlan neih turah tel an tum lo

Eastern Nagaland People’s Organisation (ENPO) leh tribal pawl dang, an thawhpuite chu Tuensang-ah inhmu khawmin, February 23, 2024-a thutlukna an siam, 'Chenmcho resolution' anga kal zel turin thu an titlu. He resolution-ah hian sorkar laipuiin an thil ngiat, Frontier Nagaland Territory a pe lo a nih chuan ENPO leh a thawhpui tribal pawl dangte chuan state leh central inthlan eng mah thlawp an tum lo a, Nagaland khawchhak lama cheng zawng zawngte chuan heng inthlanah hian vote an thlak lo ang, tiin an sawi.

Union home minister, Amit Shah chuan nikum December khan Lok Sabha inthlan atan Model Code of Conduct (MCC) puan a nih hmain sorkar laipui chuan Frontier Nagaland Territory siam a tum niin sawi mah se, tun thlenga an thil duh pek an la nih loh avang hian ENPO chuan lungawi lohna an lantir ta a ni. Tuensang-a an inhmuh khawm hnu hian ENPO leh an thawhpuite chuan thuchhuah inṭawm siamin an thutlukna tihhlawhtlin a nih theih nan ENPO kutah thuneihna an dah tih an tarlang tel bawk.

Frontier Nagaland Territory ngiatna kawnga hma an lak zel dan tur chu inhmuh khawmnaah hian an rel bawk. ENPO chuan an pawl ni lo, pawl dang tu pawhin Frontier Nagaland Territory ngiatna chungchang an ziah chu thu tlinga pawm lo turin union home ministry hnenah ziakin ngenna an thlen dawn a, eastern Nagaland huam chhunga Legislator Union-te nen an inhmu leh dawn bawk. Hei bakah hian Nagaland khawchhak lama public emergency an puan mek chu March 21-a tihtawp turin thu an ti tlu bawk a ni.