Manipur : Congress MP candidate in beih a tawk nawn

Lok Sabha inthlan neih tura Congress candidate, Alfred Kanngam Arthur chu Thawhṭannia TK Woodland Resort-a meeting an neihna hmunah silai hmanga beih a tawh hnuah Teinem khua, Ukhrul district-a party mi leh sate nen an inhmuh khawmnaah beih a tawk nawn leh. Arthur beitute hi tute nge an nih hriat a ni lo a, silai hmanga inbeihna avang hian thi leh hliam awm lo mah se, mipui pung khawmte a tithlabar hle thung a ni.

Manipur Pradesh Congress Committee (MPCC) legal department chuan Manipur chief electoral officer hnenah an candidate Arthur chu inthlan a zawh hma chu venhimna khauh tak pe turin an ngensak. Legal department chuan Arthur chu beih a tawh nawn leh avangin a nunna a derthawn thu an sawi a, amah venhim chu a pawimawh tak zet tih an tarlang. MPCC chuan Manipur chhungah hetiang chet dan duhawm lo a thleng fo a nih chuan inthlanna dik leh felfai an nei thei dawn lo niin an sawi.