Arunachal CM laina hnai contract hna pek chungchang chhui chiang turin Supreme Court-in CAG a hriattir

Supreme Court chuan Arunachal Pradesh sorkarin contract a pekah, chief minister Pema Khandu laina hnaite hnena contract pek an nih dan chu chhui chiang turin a hriattir.

Chief Minister laina hnaite hnenah contract pek a nih dan CAG chhui chiantir tura thupek tichhuaktu hi Justice Aniruddha Bose leh Justice Bela M Trivedi-te ṭhut bench niin, heng hna pek danah hian thil dik tawk lo, thuneihna hman sualna a awm em tihte CAG hian an chhui chiang dawn a ni. Hetih lai hian bench chuan kum 2010-a NGO ‘Voluntary Arunachal Sena’-in eiruk chungchangah Khandu laina hnai tak CBI chhui chiantir phutna an lo theh luh tawh chu a tihtawpsak thung.

NGO aiawha ding, lawyer Prashant Bhushan leh Neha Rathi chuan contract inpek danah hian dan bawhchhiatna tam tak a awm niin an sawi. Buhfai sem tura an thlan chhuah chu chief minister laina hnai tak niin buhfai an sem danah thil fel lo tam tak a awm a ni, an ti. Hemi bakah hian National Calamity Contingency Fund leh Calamity Relief Fund hman a nih danah pawh thil fel hlel a awm thu an sawi bawk.

CM chhungte contract pek, buhfai sem hna hi district 13 chhunga mi nuai 2 aia tam lo hnena sem tur a ni a, Public Distribution System (PDS) hnuaiah thla tin ration card holder-te hnenah kg 8-10 sem chhuah a ni ṭhin tur a ni, an ti. Mahse contract thawktute thil tih danah thil fel tawk lo a awm tih sawiin, Voluntary Arunachal Sena leh Save Mon Region Federation chuan PIL hi an theh lut a ni.

Thubuai theh luhah hian Pema Khandu pa, Dorjee Khandu nupui pahnihna Rinchin Drema leh a vahpa, Tsering Tashi te pawh sawi lan an ni bawk. Dorjee Khandu hi AP chief minister a nih lai, kum 2011 khan helicopter tlaah a thi a ni. Rinchin Drema firm, Brand Eagles hnenah hian sorkar contract lian tak tak pek a nih thu an tarlang.