Gauhati HC-in thubuai ziah luh danah inkaihhruaina thar a siam

Gauhati high court chuan Protection of Children from Sexual Offences (POCSO) Act leh Criminal Procedure Code (CrPC) Section 439 (1A) hnuaia thubuai ziah luh kalpui danah inkaihhruaina dan thar a tichhuak. He inkaihhruaina dan thar tihchhuah hian a tuartu dikna humhim leh a dawngtu tur dik tak tana hriattirna mumal pek chhuah chu a tum ber a ni.

High Court thuchhuah chuan Indian Penal Code (IPC) Sections 376, 376-A, 376-DA leh 376-DB hnuaia pawngsual thubuai ziah luhsakte chu bail phalsak an nih hmain high court emaw Session Court emaw chuan ni 15 ral hmain bail an dilna chungchang hi Public Prosecutor hnenah a hriattir ṭhin tur a ni, a ti. Investigating Officer (IO) chuan thubuai dinsaktute chu bail hearing neihnaa awm ve tura chanvo an neih thu ziakin a hriattir tur tih a ni bawk.

Thubuai ziah luh chungchanga bail dilna, ennawn, ngaihtuah ṭhat emaw petition lut reng reng chu court Registry chuan Public Prosecutor hnenah a copy a pe tur a ni a, Public Prosecutor hian case IO emaw Officer-in-Charge emaw hnenah a pe chhawng ve leh tur a ni bawk. Police officer-te hian a tuartu emaw, a tuartu chhungte emaw, a tuartu thuhretute emaw hnenah high court thutlukna hrilh hriat chu an mawhphurhna a ni. Thubuai ngaihtuah a nih lai hian court chuan POCSO Act section 33 (7) hnuaia a tuartute nihna thupsak tur tih inziak chu a zawm ngei ngei tur a ni bawk.

Thubuai ziah luhah, a tuartu lam chuan court-a dinsaktu tur rawihna an nei lo a nih pawhin a thlawna dinsak theitu an awm a ni tih hriattir an ni tur a ni tiin high court chuan a tarlang. Heng inkaihhruaina dan thar, Gauhati high court-in a tihchhuahte hi hman ṭan nghal tur a ni.