Kaziranga Park-ah Samak kaphlum

British royal couple Prince William leh Kate Middleton ten Assam-a Kaziranga National Park an tlawh laiin Samak ki pakhat nei chu thah a ni.

Venhimna khauh taka ken kawh ni mah se, British lal fapa te nupain Kaziranga National Park-a hun an hman mek laia thleng a ni a, Difflo River lodge-a an riah zana thil thleng a ni.

Ningani zing khan Samak ruang hi hmuh a ni a, sa peltute hian a ki an lak hnuah sa ruang hi an kalsan a ni. Sa huana duty te chuan Nilaini zan khan silai puak thawm an hriat thu an sawi a, rang takin an chhuizui nghal. Sapeltute hi mi panga an ni a, hnu an chhuina lamah hian samak ruang hi an chhar ta a ni.

Kaziranga National Park-ah hian kumin chhungin sapeltute chuan samak ki pakhat nei hi pasarih an kap hlum tawh a ni. Heng samak te hi hmuh tur awm zen zel loh a nih avangin humhalh zual bik an ni nghe nghe a, mahse samak ki hi a to em avangin a rukin sapeltute chuan an bei fo ṭhin.

Assam sorkar official chuan thil thleng chu pawi an tih thu a sawi a, sahuan enkawltute chu fimkhur zual turin an hriattir bakah, sapeltute chu man ngei an nih tur thu a sawi.