Manipur-ah thi pun belh
Manipur police leh Indian Army ṭangkawpte chuan hel lakah beihpui an thlak a, Nilaini khan Tamenglong district-a Longlen leh Longpi khua-ah te Zeliangrong United Front (ZUF) nen inkapin mi pathum an thi tawh. Thi zingah hian Para Commando Major pawh a tel.
April 12 aṭang khan Indian Army leh Para Commando te chuan Nungba leh a chheh velah hian hel dapchhuah beihpui an thlak ṭan tawh. Nilaini tlai lam khan an lo tih ṭhin ang thoin an che chhuak leh a, Indian Army leh ZUF te hi innang chingin Longlen leh Longpi khua-ah te hian an inkap zui ta a ni. Darkar chanve dawn an inkap a, Para Commando Major Amit Deswal chu an inbeihna hmunah hian kah hlum a ni a, midang pahnihte chuan nunna an chan bawk.
Major Amit Deswal ruang hi Leimakhong-a headquarters of 57 Mountain Division-ah thlenpui niin, post mortem a ni. Additional SP, Nungba police station Investigating Officer leh Lamphel police station SDPO te chuan ruang hi an zui a ni. Post mortem zawh hnu hian Tulihal Bihar Regiment panpui a ni a, sipai chawimawina ropui nen lo hmuah a ni. Major Amit Deswal hi special Indian Air Force flight hmangin an khua panpui leh a ni.
Nungba bawrah hian beihpui thlak chhunzawm zel a ni. Hetih lai hian Nilaini vek khan Ragailong Khuman Lampak stadium kianga AR transit camp-ah bomb a puak a, Assam Rifles (AR)-a mi Gukulchand Yadav chuan nunna a chan bakah midang pali - Himansu Devanath (31) West Bengal, Manish Kumar (28) Bihar, K Rameshwar (32) Manipur lehGukulchand Yadav (32) Rajasthan te chuan hliam an tuar. Assam Rifles te hian Khuman Lampak Sports Complex-ah patrolling an mek lai hian bomb hi a puak a, hliam te hi Regional Institute of Medical Sciences-ah dahluh an ni.
Bomb puahna hmun hi Imphal West district police, Additional SP (Law and Order) Sarangthem Ibomcha bakah Imphal West Commando DSP Krishnatombi te chuan an endik nghal a ni.