Arunachal Pradesh sumah talbuai

Arunachal Pradesh sorkar chu sum leh paiah a talbuai mek a, contractor leh hlawh dang eng emaw zat tunah hian pek chhuah lohin a awm mek.

Finance Commissioner chuan an state sum harsatna tawh mek chu State Bank of India, Assistant General Manager (AGM) hnenah ziakin a thlen a, an harsatna tawh mekah hmalakpui turin a sawm a ni. Hetih lai hian contractor ṭhenkhat minister duhsak zawng leh, MLA bakah an chhung khat laina hnaite chuan bill hi an la chhuak tho nia hriat a ni.

Chief Minister thar Kalikho Pul chuan an state sum harsatna chinfel thuai a nih tur thu a lo sawi tawh a, nimahsela tun thlengin hmasawnna hmuh tur a la awm lo. Pul-an thuneihna a chan hnu hian sum lama an harsatna chuan ziaawm lam a pan thei lo a, an la buai deuh rih dawn niin a lang.

SSA hnuai-a zirtirtute chuan hun rei tak chhung hlawh an la tawh lo a, sorkar lakah an lungawi lo hle. All Arunachal Contractor’s welfare Association (AACWA) chuan an state-in sum leh paiah harsatna nasa tak an tawh mek laia Governor JP Rajkhowa berin aw a chhuah duh lo chu mak an tih thu an sawi. ACCAWA hian state sorkar chu State Bank of India aṭanga sum puk mai turin sorkar chu an nawr mek bawk.

Contractor-te hian an bill dawn tur neih ang pawh trea-sury office-ah a tang mek niin an sawi.