Manipur Tribal Bill-ah sorkar laipui inrawlh

Manipur state assembly chuan kum 2015 August khan An-ti Tribal Bill a pass-a, hei vang hian nasa takin an state-ah buaina a chhuah phah a ni.

Bill dodaltute leh sorkar lam chu nasa takin an inbei a, vawi eng emaw zat buaina chhuak tawhin, nunna chan mi pakua lai an awm tawh bawk. Boruak a daih mai tak loh avangin sorkar laipui pawh a inrawlh ta hial a ni.

Tribal welfare ministry chuan Mani-pur social welfare department hnenah he mi chungchangah hian ziakin lekha a thawn a, an hmalak dan tur erawh tarlan a ni lo thung. March 17 khan Union tribal welfare ministry hian state social welfare department hnenah hian lehkha hi a pe chhhuak a ni.

Manipur state assembly chuan nikum August khan Bill pathum ngaihven hlawh tak tak - the Protection of Manipur People Bill, the Manipur Land Revenue and Land Reforms Bill (Seventh Amendment) leh Manipur Shops and Establishments (Second Amendment) Bill chu a lo pass tawh a ni. Hei hi Tribal te chuan duh loin Churachandpur district-a Health and Family Welfare Minister Phungzathang Tonsing chenna leh Lok Sabha member Thangso Baite te chu an lo bei tawh nghe nghe a ni.

Bill dodalna lantirnaa buaina chhuak vanga thi, mi pakuate ruang hi Churachandpur hospital mortuary-ah dah niin Tribal te chuan an thil phut a hlawhtlin hma loh chuan phum an remti lo. Joint Committee on Inner Line Permit System (JCILPS) te chuan Inner line permit system chu Arunachal Pradesh, Mizoram, leh Nagaland-a kalpui a nih dan anga Manipurah pawh hman ve an phut a ni.

Manipur Tribals Forum Delhi (MTFD) chuan New Delhi-ah April 14 khan - the Protection of Manipur People Bill, the Manipur Land Revenue and Land Reforms Bill (Seventh Amendment) leh the Manipur Shops and Establishments (Second Amendment) Bill duh lohna latirin lungawilohna an lantir ve bawk. Romeo Hmar chuan Article 371C of the Constitution chu ṭha an tih loh thu a sawi a, Manipur tribal te chu Sixth Schedule hnuaiah hian protected an ni lo tih a sawi bawk.

Kum 2011 census-a a lan dan chuan Manipur-ah hian mihring maktaduai 2.7 vel an cheng a, chung zinga maktaduai 1.7 vel chauh chu ramleilung fate an ni.