Manipur-ah JCILPS ten press meet nei

Manipur state-a hun rei tak chhung Inner Line Permit System hman phuta kawng hrang hranga sorkar nawrtu, Joint Committee on Inner Line Permit System (JCILPS) ten thawm an rawn nei thar leh ta.

JCILPS te hian Khomdram Ratan Keishampat kaihhruai-nain Sega Road-ah Inrinni khan press meet an hmang. Khomdram Ratan chuan an state-ah ILP fel lo hnathawk 431 an awm tih a sawi a, heng mite hi dap chhuah an nih hnuah police kutah hlan an nih thu a sawi. Heng hnathawk zinga 50% te hian Identification document felfai an nei lo. Inter-State Migrant Workmen (Regulation of Employment & Condition of Service) Act, 1979 chuan heng hnathawktute hi Labour department atangin license an la tur a ni, a ti. Hnathawktute document-ah chuan an hnathawh theih, an thawh theih hun chhung engkim fel takin a awm tur a ni, tiin Khomdram Ratan chuan a sawi.

JCILPS hian State Home department chu ni nga chhunga white paper pe chhuak turin an ti a, an pe chhuak lo a nih chuan a ṭul anga hmalak an tum thu an sawi a ni. Dan loa an state-a hnathawka khawsa mekte dap chhuah hna chu an thawk zel dawn tih an sawi bawk. State sorkar leh JCILPS te hian inremna an lo siam tawh chu sorkar chuan tun thlengin a la tih hlawhtling lo niin an sawi.

An inremnaa an tarlan, Population Commission and Land Reforms Commission bakah a dang te chu thla sarih hnuah pawh hmalakna hmuh tur a la awm lo tih an sawi bawk.

Press meet-ah hian JCILPS hian thuchhuah an siam nghal a, Imphal Municipal Council (IMC) election June 2-a neih turah an ram leilung fate chauh lo chuan chuh ve a thiang dawn lo a ni, an ti. A ṭul anga hmalak chho zel an tum thu an sawi bawk.