Assam buaina chhuakah hliam 8 awm

Assam-a Dibrugarh district Mahabari tea estate-ah buaina a chhuak a, mi pariatin hliam an tuar. Hliam tuar zingah hian police panga an tel a ni.

He lai bawrah hian tunhnaiah buaina chhuak a awm zeuh zeuh a, he thil then hma pawh hian buaina tenau a lo chhuak tawh a ni.

Buaina thlenna hmun hi police te chuan an pan nghal a, buaina tihreh tumin hma an la nghal. Mahse mipuite nen intawngin boruak a sang hman hle. He buaina avanga hliam tur te hi Assam Medical College and Hospital (AMCH)-ah dahluh nghal an ni. He thil thleng hi pawl hrang hrang te chuan an dem thu an sawi.

Deputy Commissioner MS Mani-vannan, police official,Assam Tea Tribes Students’ Association (ATTSA) leh Assam Chah Mazdoor Sangha (ACMS) te chuan boruak muanawm a awm theihnan an thukhawm nghal a ni.