Congress-in MCC bawhchhiaah Assam CM an puh

Assam Pradesh Congress Committee (APCC) president Bhupen Borah chuan chief minister Himanta Biswa Sarma-a'n Model Code of Conduct (MCC) a bawhchhia tiin Election Commission of India (ECI) hnenah complaint a theh lut.

Assam CM hian campaign a neihna hmun pakhata thu a sawinaah, Indian National Congress (INC) aṭanga thlan tlinte chuan inthlan a zawh hnuah Bharatiya Janata Party (BJP) an zawm leh vek dawn niin a sawi a, hei hi MCC bawhchhiatna a ni tiin Bhupen Borah chuan complaint hi a theh lut a ni. Borah chuan an state CM-in hetiang ṭawngkam a hmang hi a tihluih a nih thu sawiin, MCC chu ama duh thu ngeia bawhchhia a nih thu a ziak lang.

Borah chuan Assam CM hian a thusawi chungchangah ṭan chhan tur mumal engmah sawi tur a nei lo niin a sawi a, vote thlaktu mipuite rilru hruai kawi tumna mai a ni, a ti. A thusawi aṭanga MCC a bawhchhiatna tarlangin, a pakhatnaah chuan thu dik lo hmanga vote thlaktute rilru lak pen a tum tiin, a pahnihnaah chuan INC candidate-te chu a thusawi hmang hian a thlem niin a ngaih theih a, hei hi inthlan dik leh fel fai neihna daltu a nih thei niin Borah chuan a tarlang bawk.

Election Commission-in inthlanna dik leh felfai neih a nih theih nan, thu dik lo hmanga inpuh bakah thudik hrula mi rilru hruai kawi thei zawnga thusawi lo tura ngenna an siam ṭhin chu Himanta chuan a bawhchhiat avangin hremna pe ngei turin Assam congress president chuan ECI hnenah a ngen a ni. Borah chuan ECI chu thlei bik nei loa rorelna dik an kenkawh ngam a beisei thu a sawi tel bawk.