Arunachal mipuite rinna neih let leh ngei kan tum : APPSC Chairman

Arunachal Pradesh Public Service Commission (APPSC) chuan kum 2022-a zawhna put ru avanga an lo hmingchhiat tawhna chu siam ṭhat tumin hma an la chhunzawm zel. Question put ru avanga an hmingchhiat hnuah hian APPSC kaltlanga hna lak pawh tihtawp zui a ni a, tunah hian hna lak an kalpui ṭhin chu chhunzawm leh ṭan an tum mek.

APPSC chairman thar atan Prof Pradip Lingfa chu ruat niin a kaihhruaina hnuaiah hian mipuite rinna neih let leh ngei an tum a, ram chhunga a ṭha bera zinga tel ngei an tum a ni. Prof Lingfa chuan,"Hun kal tawhah lo hmingchhe mah se, APPSC chu ramchhunga hna latu ṭha ber zingah hlankai leh kan tum a ni. Exam dik leh felfai kan neih theih nan inkaihhruaina dan zam thar turin kan inbuatsaih mek a ni" a ti. Inkaihhruaina dan zam (SOP) thar turah hian sorkar leh mipuite bakah exam hmachhawntute aṭangin rawtna hrang hrang a luh thu a sawi a, mithiam bik awmna committee chuan lo thilfim zelin exam dik leh felfai a awm theih nan ṭan an lak thu a sawi bawk.

Prof Lingfa chuan an kalphung thar buatsaihah chuan khawl thiamna hman ṭangkai an tum thu leh, mihring tihdik loh awm ṭhin leh buaina dang eng emaw awm ṭhin chu khawl thiamna hmanga tam tak chinfel theih a beisei thu a sawi. APPSC chairman chuan an state chhunga hna lak tur chu inkaihhruaina dan zam peih fel a nih hunah a ngai anga kalpui leh tur a nih thu a sawi a, exam hmachhawn tum zirlaite chu nghak hram hram turin a chah bawk. Zawhna put ru avanga mawhphurtu chhui chiannaah commission chuan thuneitute an thlawp ṭhat thu sawiin, mawhphurtute chu man a, an phu tawk hremna pe ngei se a duh thu a sawi.