Tripura State Rifle pakhatin smuggler vangin nunna a chan

Tripura State Rifle (TSR), Sandana Darlong chu Baghan School bul Tripura North District-a a duty-na hmunah lirthei hmanga sut niin a hliam tuar loin a boral.

Darlong hi Nilaini zan dar 11 pelh hnu khan inthlan kaihhnawiha a duty-na hmunah number plate nei mumal lo bike lo tlan tihdin a tum chu bike khalhtu chuan a rawn su lui niin an sawi. Darlong hi Kadamtala Social Health Center panpui nghal ni mah se, a dinhmunin zual lam a pan zel avangin Dharmanagar, North District Hospital-ah sawn a ni a, hemi hnu hian a hliam tuar loin a boral tih North District Superintendent of Police chuan a puang a ni.

TSR Darlong sutu hi thuneitute chuan agarwood smuggler a nih thu an sawi a, Darlong sut nana a hman bike pawh hi Tripura aṭanga Assam panna tur a nih thu an tarlang. State chhunga sipaite pawh smuggler laka an him tak loh avangin Tripura mipui nawlpui dinhmun pawh a ṭha lo hle nia ngaih a ni. Darlong sutu pawh hi hliam na tak tawkin damdawi in lamah enkawl mek a ni bawk.