Hmarchhaka ruihhlo hmanga sumdawng lian an man

Nagaland sorkarin ruihhlo do beihpui a thlak mek chuan rah ṭha a chhuah chhunzawm zel a, hmarchhak huam chhunga ruihhlo hmanga sumdawng lian pakhat leh ruihhlo tawlh ruk kawnga a hnar kaitu zinga mi, Baharudin chu man a ni.

Baharudin man tur hian thla tam tak beih niin Nagaland Police leh Assam Police te chu an thawkho ṭha hle. Baharudin bakah hian a ṭhuihhruai midang pahnih chu Dimapur leh Imphal aṭangin man an ni bawk.

Nagaland Police thuchhuahah chuan hmarchhak hmun hrang hrangah Baharudin-a lakah hian thubuai tam tak ziah luh niin an tarlang. An mi man chu drugs hmanga sumdawng ṭhin, state tam taka inzarpharh a nih thu sawiin, Baharudin chu mi hrang hrang anga insawi ṭhin, nihna tam tak leh phone number hrang hrang a neih thu te, bihrukna ṭha tak tak a neih thute an tarlang.

"Drug tawlh rutute avang hian chhungkaw tam tak an buai a, ṭhalai tam tak ruihhlo bawihah an tang mek bawk a ni. Mipuite chu ruihhlo hmanga sumdawng leh tawlh ru ṭhinte Nagaland Police hnenah hriattir zel turin kan ngen. Hetiang, khawtlang tichhe thei hmanga pawikhawihtute hi thurualpui lo turin mipuite chu kan ngen bawk a ni" tiin an thuchhuahah hian an tarlang a, Assam leh Manipur DGP hnenah an thlawpna avangin lawmthu an sawi bawk.