Tripura-ah zirlai naupang endik dan thar chhawpchhuak

Directorate of Elementary Education (DEE), Tripura chuan zirlai naupangte thiam leh thiam loh endik dan ṭhin chu tidanglamin pre-primary zirlaite endik nan play-based evaluation hman a ni dawn tih an puang. He thil hi New Education policy zulzuia siam niin, naupang kum 3 aṭanga kum 6 inkar tana hman tur a ni ang.

Play-based evaluation-ah chuan naupangte hmasawnna tehna atana tun hma aṭanga hman ṭhin, exam system chu thlak a ni dawn. Naupang hmasawnna endik nan ni tina naupang thiltih ṭhinte, zirlai naupang chhungte leh ṭhiante'n naupang hmasawn dan an sawi aṭanga teh a nih bakah an rilru leh taksa hmasawn dan zawng zawng chu tehfungah hman a ni dawn a ni.

DEE hotu pakhat chuan naupang kum 3 - 6 inkar chu hetiang hmanga endik hi a tawk nia sawiin, in chhung leh pawn lama tih tur bituksak leh anmahni tawka inrintawkna an neih theih nana hmalak chu a pawimawh thu a sawi. An hmalakna thar chuan naupang zingah rah ṭha a chhuah ngei a beisei thu a sawi bawk.