Myanmar raltlante thawn let lo turin Manipur sorkar ngen

Burma Refugees Committee (BRC) chuan Pathianni khan thuchhuah siamin, Manipur sorkarin Myanmar aṭanga raltlante thawn let a tumna chu ngaihtuah ṭha leh tura an duh thu an tarlang. Manipur sorkar hian an state-a Myanmar mi 77 awmte chu sipai sorkar enkawl turin thawn let leh a tum a ni.

BRC hian Myanmar mi leh sate chu anmahni duh thu ni lo chuan an ram lamah thawn kir ni lo se an duh thu an sawi. Myanmar sorkarin an ram ṭhalaite sipai ṭan ngei ngei ngaihna dan a siam thar avanga an ram tlanchhiatsan tam tak an awm thu sawiin, Myanmar-a thawn let an nih chuan tihluihnaa sipaia ṭantir an nih tur thu an sawi tel bawk. Hemi rual hian Myanmar raltlante, Foreign Detention Centre aṭanga chhuah zalen an nih avangin BRC chuan Manipur sorkar hnenah lawmthu a hrilh thung.

BRC chuan Myanmar raltlante detention centre aṭanga chhuah zalen an nih hnuah Indo-Myanmar ramria awm lailawk phalsak turin Manipur sorkar chu an ngen a, boruak a ziaawm veleh Myanmar lama him taka an haw theih nan ramria awm lailawk chu raltlante chuan an mamawh thu an sawi a ni. Manipur sorkar hnenah hian Myanmar mi leh sate chu humhim rih turin an ngen a, an ram lama thawn kir leh an nih chuan sipai sorkarin ram chhunga indona thleng mekah raltlan thawn kirte chu ral hmatawngah an hmang lui dawn tih sawiin, an sahimna atan raltlante chu thawn kir lo hram turin Manipur sorkar chu an ngen a ni.

Manipur sorkarin raltlan thawn let an tum mi 77 zingah hian hmeichhia 51 leh naupang panga an awm a, dan loa India ram an rawn luh avangin Imphal-a detention centre-ah dah an ni. Thuneitute chhinchhiah danin nikum May 3 aṭanga February 27, 2024 thleng khan Myanmar mi 6,746 chuan India ram an rawn lut tawh a, heng zinga 259 chu an nihna chhinchhiahsak an nih hnuah an ram lama thawn kir leh an ni tawh.