Tripura-ah thlipuiin chhiatna nasa tak a thlen

Tripura chu thlipuiin a nuai avangin state chhung hmun hrang hrangah chhiatna tam tak a thleng a, Disaster Management Authority-in a tarlan danin chenna in 4,345 chuang chu thli tleh avang hian a chhia a ni. Heng zinga chenna in 23 chu luah leh tur awm tawh loa lak bo niin, a dang 215 chu nasa takin a chhe bawk.

District hrang hrang zingah South Tripura leh Sepahijala district chu thlipui tuar na ber an ni a, heng district pahnih bakah hian district dang Unakoti district, Dhalai district, West district, Khowai leh Gomati district-ahte pawh thlipui hian chhiatna a thlen ve bawk a ni. Chenna in bakah thlipui hian thirban eng emaw zat state chhung hmun hrang hrangah a len thlu bawk a, hmun tam takah eng chhit tur a awm loh phah a ni. Kawlphetha nei leh tura siam ṭhat hna thawh chu ruah sur nasain a tihbuai thu thuneitute chuan an sawi.

Sangha mantu pali, Dhalai district huam chhunga mite chu Dumboor reservoir a sangha an man laiin an tawmhimna hmun chu thlipuiin a la a, an zavaiin nunna an chan phah a ni. Tuikhuah chhung aṭangin an zinga pathum ruang hi chhanchhuah hna thawktute'n an la chhuak tawh a, mi dang pakhat ruang erawh zawn mek a ni.

State Disaster Management Programme-a an hotu pakhat chuan State Disaster Management Fund (SDMF) aṭangin thlipui avanga chhiat tawk chhungkuate chu zângnadawmna pek an nih thu leh, Pathianni tlai thleng khan Rs. nuai khat chuang sem chhuah a nih tawh thu a sawi a ni. Revenue department chuan thlipuiin in leh lo a tihchhiat hlut dan an tehna aṭangin zângnadawmna chu pek chhuah a la ni zel dawn niin a sawi bawk.