Assam CM-in Miya hnam naupangte inneihtir ṭhin titawp turin chah

Assam chief minister Himanta Biswa Sarma chuan an state chhunga cheng Muslim Bengali ṭawng hmang, 'Miya' hnamte chu Assam leilung fa dik tak anga chhiar an nih dawn chuan, kum tling lo naupang an inneihtir ṭhin leh nupui pakhat aia tam an neih ṭhin chu tihtawp a ngai niin a sawi.

Sarma chuan,"Miya hnamte chu Assam leilung fa dik tak an nih leh nih loh chu thu hranah lo dah ta ila, ram leilung fa dik tak nih an duh a nih chuan kum tling lo inneihna leh kawppui pakhat aia tam an neih ṭhin hi an tihtawp phawt a ngai a, hmeichhiate zirna lama an hmasawnna an ngaihtuah a ngai bawk a ni" a ti.

Assam culture leh nupui pakhat aia tam neih chu a inrem loh thu Chief Minister chuan a sawi a, Miya hnamte chuan he chin dan hi an tihtawp a ngai niin a sawi. Sarma chuan Muslim Bengali ṭawng hmang an state chhunga awmte chuan Assamese chin dan phung an zawm ve thei a nih chuan ram leilung fa anga chhiar tel theih an nih thu a sawi bawk.