Meghalaya-ah tlawmngai pawlte'n CAA duh lohna lantir

Citizenship Amendment Act (CAA) dan hman ṭan a nih tur duh loin, Mawkyrwat, Meghalaya-a tlawmngai pawl hrang hrangte chuan CAA an duh lohna an lantir. CAA dodalna lantirtute hi Khasi Students Union (KSU), Federation of Khasi-Jaintia and Garo People (FKJGP) leh Synjuk Ki Seng Samla Shnong (SSSS)-te an ni a, CAA an dodal chhan chu Meghalaya-a cheng ram leilung fate tan a him loh vang a nih thu an sawi.

Tlawmngai pawlte hian CAA an dodal chhan langsar tak pakhat chu Bangladesh, Pakistan leh Afghanistan aṭanga Muslim ni lo, sakhaw dang betute'n India khua leh tui ni turin District Level Committees kaltlangin anmahni inlan kher ngai loin khua leh tui nihna awlsam taka an dil thei chu a ni tiin, hei hi an state tan pawh a ṭha lo hle tih an tarlang.

KSU South West Khasi Hills district unit president, Forwardman Nongrem chuan Meghalaya state chhunga chengte inhumhim nan Inner Line Permit (ILP) hman an mamawh thu a sawi a, ILP chu tun dinhumna an state mamawh ber a nih thu a sawi. Tlawmngai pawlte hian thuchhuah siamin, khaw hrang hranga khaw chhung hotute chu pawn lam mi, an khaw chhunga inbenbel tum an awm leh awm loh thlithlai reng turin an hriattir bawk a ni.