Manipur : Myanmar raltlan 200 chuangin tawmhimna an zawng

Myanmar ramah sipai leh helpawl inkahnain zual lam a pan leh tak avangin Myanmar mi 200 chuang chu Moreh, Manipur ah tlan lutin tawmhimna an zawng. Raltlan tam zawk hi hmeichhia leh naupang an ni.

Tamu district, Myanmar-a Walphabung khuaah Thawhlehni tlai lam khan inkahna thleng avangin mipui hlauthawng chuan Moreh lam hi an pan a ni. Thuneitute chuan mi 200-te hi himna zawnga rawn lut an nih thu sawiin Border Pillars number 79 leh 80 kaltlangin India ram an rawn luh thu an sawi.

An ram chhungah buaina a thlen reng avangin tawmhimna zawngin India ramah hian Myanmar aṭanga raltlan an tam hle a, hmarchhak state-ah Mizoram, Manipur leh Nagaland lama lut an tam hle a ni. Manipur pawh hian ṭum khata mi tam tak tlanchhia a dawn vawi khatna a ni lo a, nikum November khan buaina tlanchhiatsan tum mi 6,000 chuang chu Ukhrul leh Kamjong kaltlangin Manipur-ah hian an lo lut tawh bawk a ni.