Hmarchhak Petrol dealer-ten lungawi lohna lantir nan March 30 - April 1 chhung Petrol pump khar dawn

North East India Petroleum Dealer's Association (NEIPDA) chuan lungawi lohna lantir nan March 30 aṭanga April 1 thleng hmarchhak huam chhungah petrol pump zawng zawng an khar dawn tih an tarlang.

Petrol dealer-te hi kum 2017 hnu lama Dealers Commission ennawn a nih loh vang leh tihpun a nih loh vanga lungawi lo an ni. March 28, Ningania General meeting an neihnaah petrol pump khar vek turin thutlukna an siam a ni.

NEIPDA hian tukin zing dar 5 aṭanga April 1 zing dar 5 thleng 'No Purchase No Sale' kalpui turin an rel a, an association hian Dealers Commission tihpun leh ennawn an ngiat a ni. NEIPDA Vice President, Kabindra Oja chuan thil man pung zel avangin petrol retail-a pekchhuah pawh a hlawk lo ve zel a, kum sarih chhunga vawi khatmah commission tih pun a nih loh avang hian petrol pump neitute chuan an tuar hle niin a sawi.

February 3 khan NEIPDA hian oil company hnenah an harsatna hi ziakin an thlen tawh a, mahse an ngenna hi ngaihsak an nih loh avangin nawrh an huaihawt mai a ngai ta niin an sawi. Dealer-ten commission an ei ve ṭhin ennawn bakah dealers- ten dikna leh chanvo hrang hrang an neihte namnul a ni ṭhin chu pawi an tih thu NEIPDA chuan an tarlang bawk a, heng avang hian petrol zawrh chhuah zel chu an tan a harsat thu an sawi a ni.