Hmarchhak state pathumah AFSPA pawt sei

Sipai hnena thuneihna sang pekna, Armed Forces Special Powers Act (AFSPA) chu hmarchhak state pathumah hman chhunzawm tura pawhsei a ni.

Assam :

Assam sorkar chuan April 1 aṭanga chhiar ṭan turin an state chhunga district paliah Armed Forces Special Powers Act (AFSPA) chu thla ruk chhung hman chhunzawm a nih tur thu an puang. Assam sorkara political department chuan Tinsukia, Dibrugarh, Charaideo leh Sivasagar districts chu AFSPA dan hnuaiah 'disturbed area' an nih thu tarlangin, heng district-ah hian AFSPA chu September 30 thleng hman chhunzawm a ni ang.

Assam police chuan heng district paliah hian helpawl pakhat chuan awm hmun an la khuar thuk hle tih an tarlang a, mahse an state pumpui anga thlir chuan dan leh thupek kenkawh kawngah hma an sawn hle thung niin an sawi. Assam sorkar hian sorkar laipui hnenah heng district-te hi helpawl awmna hmun a nih vangin AFSPA chu hlip hrih lo turin ngenna an thlen a, sorkar laipui chuan Assam sorkar rawtna thlen hi a lo pawmpui a ni.

October 1, 2023 khan Assam-a AFSPA hmanna zinga mi, Jorhat, Golaghat, Karbi Anglong leh Dima Hasao district-ahte chuan he dan hi hlih a lo ni tawh thung.

Nagaland :

Sorkar laipui chuan Nagaland huamchhunga district pariatah AFSPA chu hman chhunzawm a ni dawn tih a puang bawk. District pariat bakah hian district hrang dang pangaa police station 21 huamchhungah he dan hi hman chhunzawm a ni bawk ang.

AFSPA hi Dimapur, Niuland, Chumoukedima, Mon, Kiphire, Noklak, Phek, leh Peren district-ahte thla ruk chhung pawh sei a ni. Heng district leh Police station 21 huamchhungte hi AFSPA dan hnuaia Section 3-na hnuaiah 'disturbed area' ah puan an ni a, April 1 aṭangin dan hman hun chhung pawhseina hi chhiar ṭan tur a ni ang.

Arunachal Pradesh :

April 1 aṭanga chhiar ṭan turin Arunachal district pathum leh district pakhata police station pathum huam chhungah AFSPA hman hun chhung pawh sei a nih bawk tih Ministry of Home Affairs chuan an tarlang.

Tirap, Changlang, leh Longding district-ahte AFSPA dan chu hman chhunzawm tur a ni. Hemi bakah hian Namsai district-a police station pathum huam chhung chu helpawl lam an la awm avangin AFSPA, 1958 Section 3 hnuaiah 'disturbed area'-ah puan an ni tel bawk.

AFSPA hi dan sakei tia hriat lar a ni a, he dan hnuaiah hian sipai thuneihna a sang hle a ni. He dan hi 1958 khan hman theih tura peih fel a ni. AFSPA dan hmanna hmunah hian sipai chuan warrant tel loin mi an man theih bakah in leh lo dap tur pawhin phalna lak hmasak a ngai lo. Sipai mi leh sate chuan beihpui an thlak laia pawi an khawih a nih pawhin AFSPA dan chuan sipaite tan pawikhawih thubuai lakah humhimna sang tak a pe bawk a ni.