Manipur-in Easter Sunday-a hna thawk tura thupek siam a sut leh

Manipur sorkarin March 31, Easter Sunday chu hnathawh ni a a puan avangin dodalna a a nasa hle a, sorkar chuan darkar 24 ral hmain a thupek hi a sut leh a ni.

Easter Sunday hna­thawh ni atana puanna thupek hi Nilaini khan Manipur sorkar chuan a ti chhuak a ni. He thu chhuahah hian March 30 leh 31 chu sorkar kum tawp a nih tawh dawn avangin hnathawh tur a tam a, chuvangin tihtur ṭulte mumal taka zawh fel a nih theih nan ni 30 leh 31 chu sorkar hnathawkte tan hnathawh niah an puang tiin an tarlang.

March 31 hi Kristiante ni pawimawh, Easter Sunday a nih vangin sorkar thuchhuah hian sawisel a tawk nasa hle. Ningani khan Manipur sorkar chuan thuchhuah dang siam leh nghalin, March 31 chu chawlh a nih thu an tarlang a, mahse March 30-ah chuan sorkar hnathawk tan pisa kai a ngai thung. Sorkar kum tawp a nih angin, sorkar sum pekchhuah leh dawn tur tihfel ngai tam tak a awm niin an tarlang tel bawk.