Arambai Tenggol-in Manipur-ah campaign khuahkhirhna siam

Meitei kalfawr pawl, Arambai Tenggol chuan Manipur state-a Lok Sabha inthlan neih turah campaign dan chungchangah khauhkhirhna a siam. Hemi chungchanga hriattirna hi Arambai Tenggol Control Room Operation aṭanga tihchhuah a ni a, Saishram Robertson chuan thuchhuahah hian a hming a ziah hnan a ni. Arambai Tenggol ho thuchhuah chungchangah hian Manipur leh Central-a BJP kaihhruai sorkar chuan sawi engmah an nei lo.

Manipur-ah hian Lok Sabha inthlan hi chhawng hniha neih a ni dawn a, a vawi khatna chu April 19-ah neiin, a vawi hnihna chu April 29-ah a ni thung ang. Heng inthlan lo awm tur atana campaign tumte chu mi mit leh beng la thei tur ang bera campaign lo tur leh uchuak taka che lo turin Arambai Tenggol hian a hriattir a ni. Hetiang hawi zawnga campaign chu an phal loh thu an chhuah.

Arambai Tenggol chuan khawchhunga au rinna leh sound amplifier hman hian mipui tan bengchheng (noise pollution) a siam avangin hetiang bungrua hi inthlan neihna turah hian hman an phal loh thu an tarlang. Hemi bakah hian political party leh candidate zawng zawngte chu party flag tar lo turin an hriattir bawk a ni.

Meitei kalfawr pawlin inthlan hmaa party leh candidate-te tih loh tur an tarlan zingah house-to-house campaign neih loh tur tih te, kawngzawh emaw political meeting lian tham huaihawt lo tur tihte a tel. Vote thlaktute pawh, inthlan campaign changchawia candidate emaw party lam aṭanga pawisa an dawn hnuah ruaiṭheh tawh lo turin an hriattir bawk a ni.