Arunachal Assembly inthlan turah BJP candidate 10 tling tawh

Arunachal Pradesh assembly inthlan lo awm turah party hrang hrangin hnehna chan ngei tumin ṭan nasa takin an la a, inthlan boruak pawh a sang tawh hle. Hemi karah hian BJP candidate 10 chu vote thlak a nih hmain hauhin hnehna changtuah puan theih an ni der tawh.

BJP candidate tling tawhte hi an dinna biala chuhtu dang awm loh avanga tling an awm laiin, an khingpui turte inhnukdawk leh an awm vanga tling ta pawh an awm. Hemi bakah hian anmahni khin tuma hming pe lutte nomination hnawl an nih avanga chuhtu awm loa tling an awm tel bawk.

Arunachal Pradesh chief minister Pema Khandu pawh chuhtu dang awm loh avanga tling zingah hian a tel a, a dinna tur Mukto assembly constituency-ah din tuma hming pe lut dang an awm lo a ni. CM Khandu bakah hian Deputy CM Chowna Mein pawh Chowkham biala a khingpui tur Congress candidate a inhnuhdawh leh avangin tlinga puan a ni bawk. BJP candidate dang pariat tlingte leh an bial chu; Hage Appa (Ziro-Hapoli), Mutchu Mithi (Roing), Ratu Techi (Sagalee), Techi Kaso (Itanagar), Jike Tako (Tali), Dasanglu Pul (Hayuliang), Dongru Siongju (Bomdila) leh Nyato Dukam (Taliha)-te an ni.

AP chief electoral officer, Pawan Kumar Sain chuan heng constituency 10 zinga parukah hian inthlan chuh tuma hming pe lut pakhat chauh an awm thu sawiin, a bak bial paliah hian eptu lam aṭanga hming theh luhte chu an inhnukdawk leh niin a sawi. AP state BJP chuan bial 10-a hnehna an chang nghal der hi an headquarters-ah lawmna hun an hmang a, hetah hian CM Khandu chuan thu sawiin MLA a tling zawng zawngte a lawmpui thu a sawi.

CM Khandu hian an state chhunga bial 60 awmah bial zawng zawng an lak theih a rin thu a sawi a, heng biala an mi thehchhuahte chu mi ṭha leh chhawr tlak tak tak an nih thu a sawi zui bawk. BJP sorkar chuan an state chhunga hmasawnna tluantling a awm theih nan ṭan an la zel dawn a ni, a ti.