Tripura-ah Vande Bharat Express a lut ang : Union Minister

Union Minister Pratima Bhoumik chuan India rama rel chak leh ṭha ber zinga mi, Vande Bharat Express chu Tripura-ah luhtir tura hma lak mek a nih thu a sawi. Bhoumik hian Dhanpur-a election rally neihnaah he thu hi a sawi a ni.

Union minister chuan Northeastern Frontier Railway (NFR) chuan Vande Bharat Express luh theihna turin rel kawng an thawm ṭha mek a, Agartala aṭanga Dharmanagar inkara rel kawng chu chei ṭhat mek niin June emaw July-ah emaw he hna hi an thawk zo tura ruahman a nih thu a sawi.

Pratima Bhoumik chuan Vande Bharat Express hmanga zin veivah theih a nih hunah Agartala aṭanga Guwahati kal hun chhung chu darkar nga chauh a nih tawh dawn tih a sawi. Prime minister Modi kaihhruaina hnuaiah hmasawnna hrang hrang an neihte a sawi lang a, sorkar kal tawhte tih theih loh rail kawnga hmasawnna thlen pawh Modi sorkar chuan a tih theih thu a sawi. Heng bakah hian Tripura chhunga hmasawnna a awm theih nan project hrang hrang chhawp chhuah a nih thu a sawi a, heng zingah hian kum ruk chhungin University paruk an neih hman thu te leh mipuite'n hmasawnna an neih theih nana scheme hrang hrang chhawp chhuah a nih thu a sawi tel bawk.