Arunachal Pradesh-ah AR motor ambush, Sipai pakhat a thi
Arunachal Pradesh-a Changlang district-ah Pathianni khan Assam Rifles motor, tui phur chu tu tih hriat lohten an ambush a, sipai pakhat a thi a, mi dang pakhatin hliam na tak a tuar.
AR motor an ambush-na hi Jairampur leh Nampong inkara Hetlong khaw bul a ni a, a lo changtute hian water tanker tlanna turah Improvised Explosive Device (IED) an lo tipuak a ni. Pawikhawihtute hi hriat ni lo mah se, NSCN(O) leh ULFA(I) joint team nia rinhlelh an ni a, mahse finfiahna erawh an la nei lo.
Sipai motor lo changtute hian IED an tihpuah hnuah 19 Assam Rifles sipaite chu silaiin an kap zui nia sawi a ni a, an lo channa hmunah hian silai mu pawh eng emaw zat hmuh a ni.
AP-a district pathumah AFSPA pawtsei
Arunachal Pradesh-a district pali leh police station pali huam chhung chu sorkar laipui chuan 'Disturbed Area' ah puan chhunzawm lehin, thla ruk dang Armed Forces Special Powers Act (AFSPA) hnuaiah a dah chhunzawm.
AFSPA pawhseina district-te chu Tirap, Changlang leh Longding a ni a, heng district bakah police station pali - Namsai district-a Namsai leh Mahadevepur bakah Lower Dibang-a Roing leh Lohit district-a Sunpura-ahte puan chhunzawm niin, nakkum March 31 thleng atan pawhsei a ni.