Hmarchhakah thlipui leh ruahpuiin chhiatna tam tak thlen

India Meteorological Department (IMD)-in a lo sawi lawk angin, Pathianni khan hmarchhak state hrang hrangah thlipui leh ruah nasa takin a thawk a, chhiatna tam tak a thlen a ni. Hmarchhak hmun hrang hranga chhiatna thleng hian nunphung pangngai a tikhaihlak hle a, thuneitute leh chhanchhuah hna thawktute chu nungphung pangngaia mipui an let leh vat theih nan ṭan lain an vir buai hle.

Tripura : Thlipui avangin chenna in 600 chuang a chhia

Pathiannia thlipui tleh leh ruah sur nasa avangin, Tripura-ah chuan chenna in 616 a chhia niin State Emergency Operation Center, Agartala chuan a tarlang.

Chenna in chhe zingah hian in 37 chu luah leh tur awm loin thlipui hian a len chhia a, in 125 chu nasa taka tihchhiat ni bawkin a bak in 454 chu luah tlak la ni mah se, thlipui vang hian in leh a chhehvel tlem a zawng chu a chhe ve bawk.

Thlipui vanga chhiatna thleng zingah chenna in tihchhiat hi a langsar ber ni mah se, ruah sur nasa leh thlipui hian chhiatna dang a thlen bawk. Thingkung tluin kawlphetha hrui leh lirthei delh chhiat a nei nual a, thlipui hian hmun hrang hrangah thirban a len thlu bawk. Heng bakah hian thingkung tlu leh lei min avangin kawngpui kaltlang theih lohna a awm nual a ni. Thuneitute chu kawngpui dangtu thenfai bakah eng pek chhuak leh thuai a nih theih nan tihtur ṭul tiin an hmanhlel hle a ni.

Assam : Hmun hrang hrangah chhiatna thleng

Cachar, Assam-ah nutling pakhat chu thingkung tluin an in a delh avangin a nunna a chan. Nunna chan ta hi kum 35 mi niin, a nau pawm lai erawh vanneihthlak takin a him a ni. Pathianni zan khan Assam-ah hian thlipui a tleh bakah rial tla avangin chhiatna tam tak a thleng a ni.

Bongaigaon district, Assam chu rial tla avang hian an buai hle. Rial tla hian in chung tam tak a den chhiat bakah zirna inchung pawh a deng chhe nual a ni. Talguri khuaah chuan chenna in a den chhiat nual avangin khaw mipuite chu an mangang hle a, khuaa chengte chuan sorkar hnenah ṭanpuina an ngen. Bilasipara, Assam-a rial tla zingah kg 1 laia rit pawh a awm tel.

Guwahati-a Lokpriya Gopinath Bordoloi International Airport chung khuhna chu thlipui thawkin a la bawk. Airport chhunga kum upa lamte awm khawmna tura ruahman chung chu thlipui hian a la nia tarlan a ni a, hei vang hian terminal chhungah hian ruah tui a luh phah nasa hle.

Digunsora Tea Estate-ah pawh thingpui huana hnathawk mi paruk chu ṭekin a deng hlum bawk. Thi bakah hian hliam tuar eng emaw zat awmin, anni hi Silchar Medical College-ah enkawl turin phurh luh nghal an ni. Boko Lampi-ah chuan ruah sur nasa hian tui lian a thlen a, khaw chhung mite chuan an chenna in chhuahsanin tawm hulna dang an zawng a ni.

Goalpara district-ah pawh ruah, rial leh thli hian chhiatna tam tak a thlen a, chenna in bakah buh hmun tam tak a tihchhiat thu an sawi. Assam chief minister Himanta Biswa Sarma chuan chhiat tawk zawng zawngte chu sorkarin a thlahthlam dawn lo tih a sawi.

Manipur : Thlipuiin state chhimchhak lam a nuai

Manipur chhimchhak lam chu Pathianni zing khan thlipui, ruahpui leh ṭek tlain a tibuai hle.

Thlipui vang hian chenna in 40 chuang a chhia a, hemi kaihhnawihah hian hmeichhia pangain hliam an tuar nia tarlan a ni. Chhungkaw tam tak chu chenna in nei loa an awm avangin sorkar chu anmahni ṭanpui turin an ngen a ni. Chenna in tam tak a chhiat bakah, thlipui leh ruah thawk hian an thlai chin tam tak a tichhia a, ran vulh lai chânte pawh an awm bawk.