VPP President-in Meghalaya tana ILP neihna daltuah BJP leh NPP a puh

Voice of People Party (VPP) president Ardent Miller Basaiawmoit chuan Sohra-a rally an neihnaah Meghalaya tana Inner Line Permit (ILP) pekna daltute chu BJP leh National Peoples Party (NPP) kaihhruai, an state-a rorel lai, Meghalaya Democratic Alliance (MDA) an nih thu a sawi.

VPP president Basaiawmoit chuan sorkar laipuiin Bengal Eastern Frontier Regulation (BEFR), 1873 a siam ṭhat khan 'Khasi' leh 'Jaintia' tia inziak chu 'State of Manipur' tiin an thlak niin a sawi a, hetiang ti tur hian BJP leh NPP chu an inthurual a ni, a ti. Meghalaya-a sorkarna siam mek MDA sorkar chu hetiang thil pawimawh tihdanglam a nih laia engmah sawi loa an ngawi reng thei chu mak a tih thu sawiin, Meghalaya-ah ILP hman duh anga an insawi chu awih harsa a tih thu a sawi bawk. MDA sorkar chuan BEFR tihdanglam chu dodal loin an en liam mai mai a ni, a ti.

Party thupuangtu Batskhem Myrboh pawhin Meghalaya state assembly-in ILP hman duhna resolution a pawm chu thil awmze nei thui lo tak a nih thu sawiin, mipui laka thiamchan nana ti chauh an ni tih a sawi ve bawk. Hetianga state sorkarin a tih chhan chu, ILP duhtute'n pek an nih loh chhan an zawh changa sorkar laipui an puh theih nana ti chauh an ni, a ti.